Qozog‘iston Prezidenti Qosim-Jomart To‘qayev mamlakat poytaxtiga Ostona nomini qaytarishni nazarda tutuvchi qonunni imzoladi. Bu haqda davlat rahbari saytida xabar berildi.

Qayd etilishicha, To‘qayev “Qozog‘iston Respublikasi Konstitusiyasiga o‘zgartish va qo‘shimchalar kiritish to‘g‘risida”gi qonunni imzolagan. Qonunda asosiy o‘zgarishlar orasida Nur-Sulton o‘rniga poytaxtga Ostona nomining qaytarilishi bor edi.

Bu shahar nomining oltinchi bor o‘zgarishidir.

Dastlab 1830-yilda "qozoqlar posyolkasi" sifatida tashkil etilgan shahar Akmolinsk deb atalgan. 1961-yilda u Tselinograd deb o‘zgartirildi. 1992-1998-yillarda shahar Oqmola deb atalgan.

1997-yil dekabrda Nursulton Nazarboyev tashabbusi bilan Qozog‘iston poytaxti Olma-Otadan Oqmolaga ko‘chirildi, 1998-yil may oyida esa Ostona (qozoq tilidan tarjimasi — “poytaxt”) deb o‘zgartirildi.

Prezident To‘qayev tashabbusi bilan 2019-yil mart oyida birinchi prezident Nursulton Nazarboyev sharafiga mamlakat poytaxti Nur-Sultonga o‘zgartirildi.

2022-yil sentabr oyi boshida Yangi Qozog‘iston deputatlar guruhi respublika poytaxtini o‘zining sobiq nomi Ostonaga qaytarish tashabbusi bilan chiqdi.

“Biz shaharga insonning tirikligida uning nomi berilishini noto‘g‘ri deb hisoblaymiz, bundan tashqari, xalq ham poytaxtning yangi nomini qabul qilmadi”, — deyiladi deputatlar bayonotida.

Prezident To‘qayevga deputatlarning ushbu tashabbusi haqida ma’lumot berildi va 16-sentyabr kuni parlament tomonidan qabul qilingan konstitusiyaviy tuzatishlarga Qozog‘iston poytaxtining sobiq nomini qaytarish taklifini kiritishga kelishib oldi.

• Poytaxt
• Qozog‘iston