Qozog‘istonda ijtimoiy ahamiyati yuqori bo‘lgan mahsulotlarga davlat narxi belgilandi. Bu haqdagi qarori kecha, 5-yanvar kuni Qozog‘iston rahbari Qosim-Jomart Tokayevning mamlakatdagi ijtimoiy-iqtisodiy vaziyatga bag‘ishlangan yig‘ilishida qabul qilingan.

Jumladan, suyultirilgan gaz narxi viloyatlarga qarab 50 tengeden 75 tengegacha, AI-80 benzin 89 tenge, AI-92-93 182 tenge, AI-95 215 tenge etib belgilandi. Shuningdek, qo‘y va qoramollar eksporti 6 oyga, sabzi va kartoshka eksporti 3 oyga taqiqlandi. Kommunal to‘lovlar narxini oshirishga esa moratoriy joriy qilindi.

Yig‘ilishda Qosim-Jomart Toqayev 180 kun muddatga benzin va dizel yoqilg‘isi, ijtimoiy ahamiyatga ega oziq-ovqat mahsulotlari narxlari davlat tomonidan tartibga solinishini ma’lum qilgan.

Bundan tashqari yangi hukumatga aholining ijtimoiy himoyaga muhtoj qatlamlari uchun ikkilamchi uy-joy uchun ijara haqini subsidiyalash masalasini ko‘rib chiqish vazifasi ham topshirilgan.

• Namoyish
• Qozog‘iston