Qozog‘istonda barcha banklar, shuningdek, fond birjasi faoliyati vaqtincha to‘xtatildi. Bu haqda mamlakat Milliy banki matbuot kotibi Oljas Ramazanov ma’lum qildi.‌‌

“Moliya bozorini tartibga solish va rivojlantirish agentligi va Qozog‘iston Milliy banki huquqni muhofaza qiluvchi organlar tomonidan aksilterror operatsiyalar o‘tkazilayotganini va internet tarmog‘idagi vaqtinchalik uzilishlarni hisobga olgan holda, shuningdek, moliya tashkilotlari xodimlari va moliyaviy xizmatlar iste’molchilarining hayoti va sog‘lig‘ini himoya qilish maqsadida barcha moliya tashkilotlari faoliyati vaqtincha to‘xtatilishi haqida ma’lumot beradi”, – dedi Ramazanov.

Eslatib o‘tamiz, Qozog‘istondagi vaziyat 2-yanvar kuni Janao‘zen shahrida (Mang‘istau viloyatidagi shahar, mamlakat g‘arbida) suyultirilgan gaz narxining keskin oshishiga qarshi mitinglar bilan boshlangan edi.

Keyin bu miting iqtisodiy va siyosiy talablar bilan butun mamlakat bo‘ylab ommaviy norozilik namoyishlariga aylanib ketdi.

• Namoyish
• Qozog‘iston