Qozog‘iston prezidenti Qosim-Jo‘mart Toqayev mamlakatdagi voqealarni davlat to‘ntarishiga urinish deb atadi. Bu haqda u Kollektiv Xavfsizlik Shartnomasi Tashkiloti Kollektiv xavfsizlik kengashining onlayn tarzda tashkil etilgan navbatdan tashqari yig‘ilishida aytib o‘tdi.

Ma’lum qilinishicha, KXSHT sammiti Qozog‘istondagi tartibsizliklar qurbonlari xotirasiga bir daqiqalik sukut saqlash bilan ochildi.

Qosim-Jo‘mart Toqayev Qozog‘istonda joriy yil boshidan buyon sodir bo‘lgan barcha voqealar bir zanjirning halqalari ekanini, “ular uzoq vaqt tayyorlangan yagona buzg‘unchi rejaga bo‘ysundirilganini” aytgan.

“Tartibsizliklar tashkilotchilari tinch mitinglardan foydalandi, diniy radikallar, ashaddiy banditlar, talonchilar va mayda bezorilar yagona buyruq asosida namoyon bo‘ldi”, – dedi Qozog‘iston prezidenti.

Prezidentning aytishicha, terrorchilarning asosiy maqsadi hokimiyatni qo‘lga kiritish bo‘lgan.
Shuningdek, Toqayev banditlar politsiyachilarni o‘ta shafqatsizlik bilan kaltaklagani va ulardan ikki nafarining boshini kesib tashlaganini ma’lum qildi. Qozog‘iston prezidentining aytishicha, KXSHT tinchlikparvar kuchlari kelganidan xabar topgan jangarilar Qozog‘iston prezidenti qarorgohini egallab olish rejasidan voz kechgan.

“Qozog‘istonda KXSHT tinchlikparvar missiyasidan 2030 kishi va 250 ta texnika bor, – degan Qosim-Jo'mart Toqayev. – Biz uchun KXSHTning nafaqat harbiy, balki ma’naviy yordami ham prinsipial ahamiyatga ega. Mamlakatda konstitutsiyaviy tartib tiklandi”.

Shuningdek, u yaqin kelajakda jahon hamjamiyatiga Qozog‘istonda terakt uyushtirilganiga oid dalillar taqdim etilishini ta’kidlab o‘tgan.

• KXShT
• Namoyish
• Qozog‘iston