Qozog‘istonda yuz berayotgan tartibsizliklar fonida uran narxi 9 foizga qimmatlashdi.

Ma’lum qilinishicha, uran COMEX birjasida 9,26 foizga, bir funti uchun 46 dollargacha qimmatlashgan. Ta’kidlanishicha, narx jahon uranining 40 foizidan ortig‘ini ishlab chiqaradigan Qozog‘istondagi so‘nggi voqealar tufayli ko‘tarilmoqda.

“Qozog‘iston dunyodagi birinchi raqamli uran yetkazib beruvchisi, buni Saudiya Arabistonida neft bilan bog‘liq muammolar yuzaga kelishi bilan solishtirish mumkin”, - degan UxC LLC yadro yoqilg‘isi bozorini o‘rganish va tahlil qilish kompaniyasi prezidenti Jonatan Xinze.

Unga ko‘ra, uran tanqisligi ehtimoli haqiqatda bozorda tanqislik bo‘lmasa ham, hozirda investorlarning kayfiyatini belgilaydigan omildir.

Xabarda keltirilishicha, 6-yanvar kuni London fond birjasida tabiiy uran qazib oluvchi “Kazatomprom” davlat kompaniyasining global depozit kvitansiyalari tushib ketgan. Ma’lumotlarga ko‘ra, kompaniya aksiyalari 4,5 foizga tushib, har bir aksiya uchun 35,83 dollarni tashkil qilgan.

Ma’lumot o‘rnida aytish joizki, joriy yil 2-yanvar kuni Qozog‘istonda norozilik namoyishlari boshlangan, so‘ngra ommaviy tartibsizliklar va namoyishchilarning xavfsizlik kuchlari bilan to‘qnashuvlarga aylangan. Bo‘layotgan voqealar fonida mamlakat hukumati iste’foga chiqqan. Qozog‘istonda favqulodda holat e’lon qilingan.

Qozog‘iston prezidenti Qosim-Jomart To‘qayev 5-yanvar kuni Kollektiv Xavfsizlik Shartnomasi Tashkiloti davlatlari rahbarlariga yordam so‘rab murojaat yo‘lladi. Bunga javoban KXSHT Qozog‘istonga kollektiv tinchlikparvar kuchlarini yuborishga qaror qilgan edi.

• Narx-navo
• Qozog‘iston