Qozog‘istonda noqonuniy xatti-harakatlar va so‘nggi voqealar tufayli biznesga yetkazilgan dastlabki zarar 40 milliard tenge (91,8 million dollar)ga baholanmoqda. Bu haqida Qozog‘iston Milliy tadbirkorlar palatasi ma’lumotlariga tayanib, Sputnik xabar berdi.

Ma’lum qilinishicha, tadbirkorlar palatasi biznes birlashmalari bilan birgalikda ko‘rilgan zararning taxminiy miqdori to‘g‘risida ma’lumot to‘plamoqda. Ma’lumotlarga ko‘ra, 43 ta obyektda, jumladan, 12 ta savdo-ko‘ngilochar markazi va savdo uylarida joylashgan 300 taga yaqin tadbirkorlik subyektlari aniqlangan.

Qayd etilishicha, zararning katta qismi savdo, umumiy ovqatlanish, transport, xizmat ko‘rsatish sohalari, shuningdek, moliya sektori subyektlariga, xususan, bankomatlarga yetkazilgan. Bundan tashqari, Olmaotada oltita qurol-yarog‘ do‘koni talon-taroj qilingani haqida xabar berilgan.

“Zararning umumiy miqdori taxminan 40 milliard tengeni tashkil etmoqda. Ammo, hozircha zararning hammasini hisoblashning imkoni yo‘q, chunki ko‘pchilik ijarachilarning obyektlaridan xabar olishning imkoni yo‘q”, - deya qo‘shimcha qilgan tashkilot.

Xabarda keltirilishicha, zararning moddiy xususiyati, asosan, binolar old qismlari, kirish joylari, imoratlarning shikastlanishi, shuningdek, qimmatbaho texnikalar, jihozlar, ichki buyumlar, tovar zaxiralari va boshqalarni o‘g‘irlashning ko‘plab holatlaridan iborat.

• Qozog‘iston