Qozog‘iston Respublikasining Jambul oblasti Jualin tumanida sodir bo‘lgan yo‘l-transport hodisasida jabrlanganlar O‘zbekistonga olib kelindi.

Xabarda aytilishicha, avtohalokatda jabrlanganlar 13-may kuni Qozog‘istonning Jualin tumani markaziy shifoxonasidan mahalliy masʼullar bilan hamkorlikda soat 23:40 da olib chiqilib, 14-may kuni soat 04:55 da O‘zbekiston va Qozog‘iston chegarasi “G‘ishtko‘prik” bojxona maskaniga yetib kelishgan.

FVV xabarida Qozog‘iston masʼullari yuzaga kelgan mazkur baxtsiz hodisa oqibatlarini zudlik bilan bartaraf etish, jarohatlanganlarga tez tibbiy yordam ko‘rsatishda yaqindan ko‘mak berganini taʼkidlamoqda.

Shuningdek, vafot etgan 2 nafar fuqaroning jasadlari yashash manzili – Buxoro va Xorazm viloyatlariga yuborilgan. Mazkur avtohalokat sabab yana bir fuqaro vafot etgani maʼlum qilindi.

“Hozirda mahalliy hokimliklar tomonidan marosim tadbirlarini o‘tkazish yuzasidan tayyorgarlik ishlari olib borilmoqda. Bugun, 14-may kuni baxtsiz hodisa oqibatida yana bir fuqaro vafot etdi. Ayni paytda marhumni olib kelish yuzasidan zarur choralar ko‘rilmoqda”, – deyiladi xabarda.

Qayd etilishicha, olib kelingan 23 nafar fuqarodan, 18 nafar jarohatlanganlar Respublika shoshilinch tez yordam ilmiy markaziga joylashtirildi, 5 nafar fuqaroning ahvoli yaxshi bo‘lgani uchun uyiga javob berildi.

Hozirgi vaqtda markazga joylashtirilgan fuqarolarning ahvoli shifokorlarning qatʼiy nazoratiga olinib, tegishli muolajalar o‘tkazilmoqda.

Eslatib o‘tamiz, kecha, 13-may kuni Qozog‘istonning Jambil viloyati hududidan o‘tuvchi trassada ichida o‘zbekistonliklar bo‘lgan avtobusning traktor tirkamasi bilan to‘qnashishi natijasida avtobus ag‘darilib ketgani haqida xabar berilgan edi. Avtohalokat sabab ikki fuqaro halok bo‘lgan edi.

• FVV
• O‘zbekiston
• Qozog‘iston
• YTH