Qozog‘istonlik kriminal avtoritet, Dikiy Arman laqabi bilan mashhur Arman Jumageldiyev Qozog‘istondagi voqealarga munosabat bildirib, xalqni birdamlikka, ortiqcha tartibsizliklarga yo‘l qo‘ymasdan haqini talab qilishga, talablari qondirilganda esa tinchlikni saqlashga chaqirdi.

“Qozog‘iston uchun og‘ir vaziyat. Men Olmaotaga keldim, qozog‘istonliklar, sizlar bilan birgaman! Men aytmoqchimanki, xalq o‘z haqini hukumatdan talab qildi. Hukumat esa talablarni qondirdi. Xalqimizni tinch mitinglar o‘tkazishga, qon to‘kmaslikka chaqiraman.

Politsiyachilar, harbiylar ham qozoq bolalari, hammasi aka-ukalarimiz. Qon to‘kishga olib boradigan zo‘ravonliklardan ko‘ra, tinch yo‘l bilan olib boriladigan muzokaralarda ko‘proq natijalarga erishamiz. Mamlakatda qon to‘kilishi evaziga bo‘ladigan o‘zgarishlarni xohlayotgan tashviqotchilar bor. Ularning fitnalariga uchmaylik.

Aziz xalqim, kelinglar birlashaylik! Xalq va davlat o‘rtasida o‘zaro kelishuvga kelaylik. Mustaqilligimiz hammasidan muhim” – deydi o‘z murojaatida Arman Jumageldiyev.

• Dikiy Arman
• Namoyish
• Qozog‘iston