Qrimning Ukrainaga qaytarilishi bilan mamlakatda tinchlik o‘rnatish mumkin. Bu haqda Ukraina prezidenti Volodimir Zelenskiy bugun, 26-fevral kuni o‘zining Telegram-kanalida joylagan postida ta’kidlagan.

"Qrimni qaytarish orqali biz tinchlikni tiklaymiz. Bu bizning yerimiz. Bizning xalqimiz. Bizning tariximiz. Biz Ukrainaning har bir burchagiga Ukraina bayrog‘ini qaytaramiz", — deb yozdi Zelenskiy.

Ma’lumot uchun, Qrim 2014-yil martida Ukrainadagi davlat to‘ntarishi ortidan o‘tkazilgan referendumdan so‘ng Rossiya hududiga aylandi. 2014-yilgi referendumda Qrimdagi saylovchilarning 96,77 foizi, Sevastopolda esa 95,6 foizi Rossiyaga qo‘shilish tarafdori bo‘lgan.

Ukraina hali ham Qrimni vaqtincha bosib olingan hudud deb biladi, ko'plab G'arb davlatlari bu masalada Kiyevni qo'llab-quvvatlamoqda. O'z navbatida, Rossiya rahbariyati Qrim aholisi xalqaro huquq va BMT Nizomiga to'liq rioya qilgan holda Rossiya bilan demokratik tarzda birlashish uchun ovoz berganini bir necha bor ta'kidlagan. Rossiya prezidenti Vladimir Putinning so'zlariga ko'ra, Qrim masalasi "nihoyat yopilgan".

• Qrim
• Rossiya
• Tinchlik shartnomasi
• Ukraina