“O‘zgidromet” joriy yilning 4-noyabr kuni O‘zbekiston hududida kuzatilgan qum bo‘roni haqida ayrim faktlarni e’lon qildi.

Ma’lum qilinishicha, kecha kunning ikkinchi yarmida O‘zbekiston hududiga Qozog‘istonning janubiy viloyatlari orqali Ural-Volgabo‘yi hududlaridan sovuq qutb antisikloni front old qismi kirib kelgan. 

Qozog‘istondan kirib kelgan kuchli shamollar Jizzax, Navoiy, Buxoro va Samarqand viloyatlarida davom etdi. Jizzax, Navoiy va Buxoro viloyatida shamol tezligi maksimal 20-25 m/s ga yetdi. 

Davomli esgan kuchli shamollar natijasida cho‘l landshaftga ega hududlardagi tuproq sirtidagi chang va qum zarralari havoga ko‘tarilib, chang bulutini hosil qildi. Chang buluti shamol yo‘nalishi bo‘yicha avval Sirdaryo viloyatiga so‘ngra Toshkent viloyati va Toshkent shahrining atmosfera xavosida chang-bo‘ron va g‘uborni keskin ortib ketishiga sabab bo‘ldi. Chang bo‘ronlari va g‘ubor atmosfera xavosining ko‘rinish darajasini Sirdaryo va Toshkent viloyatlarida 500-1000 metrga, Toshkent shahrida esa 200 metrgacha chegaraladi. 
 
Ushub hodisa Buxoro, Qashqadaryo, Navoiy va Samarqand viloyati hududlarida ham kuzatilib, ushbu viloyatlar hududida ko‘rinuvchanlik 1000 metrdan past darajaga ega changli-g‘ubor qayd etildi.

4-noyabrdan 5-noyabrga o‘tar kechasi Qozog‘istonning Chimkent viloyati, Sirdaryo va Jizzax viloyatlarida ko‘tarilgan chang va qum zarralarining ma’lum bir qismi atmosferaning yuqori qatlamlarida qo‘shni Tojikistonning So‘g‘d viloyati Xo‘jand tor darasi orqali “Qo‘qon” shamollari ko‘rinishida Farg‘ona vodiysiga kirib keldi. Ayni dam vodiy viloyatlarining ayrim hududlarida ko‘rinuvchanlik 1000 metrdan past cheklanishiga ega chang-g‘ubor hodisasi kuzatilmoqda.
 
“O‘zgidromet”ning ta’kidlashicha, olib borilayogan kuzatishlar davomiyligi (150 yil) natijasida bunday holat ilgari kuzatilmagan. 
Shuningdek, markaz Respublika hududida joriy yilning 12-noyabr kuniga qadar yog‘ingarchiliklarni (janubiy viloyatlardan tashqari) kuzatilmasligini ham porognoz qilmoqda. 

Mutaxasislar tahliliga ko‘ra, atmosfera xavosida chang-g‘uborlarini yaqin kunlar ichida saqlanib qolish ehtimolligi mavjud.

“O‘zgidromet”ning Toshkent shahrida joylashgan havo sifatini ifloslantiruvchi moddalar tahlilini yurituvchi avtomatik stasionar kuzatuv postlarida chang miqdori avvaliga ruxsat etilgan me’yordan 5 barabarga, mahalliy vaqt bilan soat 21:00 va 23:00 orasida esa 30 barobargacha ko‘tarilgani qayd etilgan.
 
Mahalliy vaqt bilan soat 23:00 dan boshlab havo tarkibidagi chang miqdorini pasayish tendensiya kuzatildi va bu davr oralig‘ida chang miqdori ruxsat etilgan me’yoriy ko‘rsatkichdan 10 barobar yuqoriligi saqlanib qolmoqda.

• Ob-havo
• O‘zgidromet