Bosh prokuratura huzuridagi Departamentning Buxoro viloyati boshqarmasi va boshqa huquqni muhofaza qiluvchi organ xodimlari hamkorligida o‘tkazilgan tergovga qadar tekshiruvlarda Shofirkon tumanida faoliyat yurituvchi “B-T.” fermer xo‘jaligi rahbari T.J. xo‘jalikning sug‘oriladigan 0,6 gektar yer maydonini hech qanday hujjatsiz fuqaro J.U.ga qumdan oltin zarralarini ajratib olish faoliyatini amalga oshirishi uchun berganligi natijasida, davlat va jamiyat manfaatlariga 475,5 mln so‘m zarar yetkazilganligi aniqlangan.

Shuningdek, ushbu tumandagi “R.N.” fermer xo‘jaligi ish boshqaruvchisi D.S. xo‘jalikning 0,4 gektar sug‘oriladigan yer maydonida noqonuniy qumdan oltin zarralarini ajratib olish faoliyatini amalga oshirib kelganligi natijasida davlat va jamiyat manfaatlariga 187,1 mln so‘m zarar yetkazganligi aniqlangan.

Bu haqda O‘zbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamenti axborot xizmati ma’lum qildi.

“Mazkur holatlar yuzasidan Jinoyat kodeksining 229-6-moddasi (sug‘oriladigan yer uchastkasiga yoki uning bir qismiga bo‘lgan huquqni sotish yoxud qonunga xilof ravishda boshqacha tarzda o‘zga shaxsga berish) bilan jinoyat ishlari qo‘zg‘atilib, tergov harakatlari o‘tkazilmoqda”, – deyiladi xabarda.

• Buxoro
• Oltin
• Prokuratura