Ma’lum qilinishicha, joriy yilning 15-sentyabr kuni O‘zbekiston Respublikasi Qurolli Kuchlari akademiyasi harbiy ilmiy-amaliy ishlab chiqish markazi katta ilmiy xodimi, harbiy fanlar nomzodi, professor, iste’fodagi general-mayor Aleksandr Vladimirovich Shishlyannikov og‘ir kasallikdan keyin 73 yoshida vafot etdi. Bu haqda O‘zbekiston Respublikasi Mudofaa vazirligi matbuot xizmati xabar berdi.

A.V.Shishlyannikov 1950-yil 3-noyabrda Toshkent shahrida tug‘ilgan. Uning harbiy tarjimai holi haqiqiy jangovar ofitser va generalning yo‘lidir.

1971-yil Toshkent oliy tank qo‘mondonlik bilim yurtini tamomlagandan so‘ng, Chexoslovakiyadagi Markaziy qo‘shinlar guruhi va Germaniyadagi G‘arbiy qo‘shinlar guruhi qismlarida xizmat qilgan. 1993-1995-yillarda Tojikiston Respublikasi mudofaa vaziri lavozimida faoliyat yuritgan.

U butun umrini Qurolli Kuchlar safida xizmat qilishga bag‘ishladi.
30 yildan ortiq haqiqiy harbiy xizmati davomida Aleksandr Vladimirovich uning barcha bosqichlarini bosib o‘tdi: tank bilim yurti kursantidan tortib, O‘zbekiston Respublikasi Qurolli Kuchlari akademiyasining tezkor san’at va umumiy taktika kafedrasi boshlig‘igacha, Tojikiston Respublikasining birinchi mudofaa vaziri, leytenantdan-generalgacha.

Shuningdek, ko‘p yillik halol, vijdonan xizmati va mehnati uchun Aleksandr Vladimirovich yuksak davlat mukofotlari, jumladan 3 ta orden va 50 dan ortiq medal hamda esdalik nishonlari bilan taqdirlangan. Mamlakatimiz Qurolli Kuchlarining jangovar tayyorgarligini oshirishdagi xizmatlari, harbiy fanni shakllantirish va rivojlantirishga qo‘shgan ulkan hissasi uchun 2019-yilda Aleksandr Vladimirovich Shishlyannikov O‘zbekiston Respublikasi Prezidenti Shavkat Miromonovich Mirziyoyevning farmoniga muvofiq, “Do‘stlik” ordeni bilan taqdirlangan.

• Mudofaa
• Qurolli Kuchlar
• Tojikiston
• Toshkent