Xonadoniga quyosh panellari va quyosh suv isitgichlarini oʻrnatgan fuqarolar ehtiyojlardan ortgan elektr energiyasini hududiy elektr tarmoqlari korxonasiga sotishlari mumkin boʻladi. Bu haqda Energetika vazirligi xabar berdi.

Qayd etilishicha, quyosh panellari va quyosh suv isitgichlarini oʻrnatganda fuqarolar uchun hech qanday qoʻshimcha soliq yoki toʻlovlar joriy etilmaydi.

Aksincha, ushbu energosamarador qurilmalarni oʻrnatish hisobiga xonadoningizni tekin va uzluksiz elektr energiyasi bilan taʼminlash imkoniyatini yaratadi.

Shuningdek, fuqarolar oʻrnatilgan quyosh panellar orqali ishlab chiqarilgan elektr energiyasidan foydalangan holda oʻz ehtiyojlaridan ortgan qismini hududiy elektr tarmoqlari korxonasiga sotishlari ham mumkin.

Bundan tashqari, bugungi kunda Oʻzbekistonda jismoniy va yuridik shaxslarga quyosh fotoelektr stansiyalar, quyosh suv isitgichlarini sotib olish va oʻrnatish xarajatlarining bir qismi Davlat byudjeti hisobidan qoplab beriladi.

Shu bilan birga, quyosh panellari va quyosh suv isitgichlarini oʻrnatgan jismoniy shaxslar 3 yil, tadbirkorlik subyektlari esa 10 yil davomida yer va mulk soligʻidan ozod boʻladilar.

• Elektr energiyasi
• Energetika_vazirligi