Checheniston rahbari Ramzan Qodirov ChGTRK “Grozniy” telekanalida bo‘lib o‘tgan to‘g‘ridan to‘g‘ri efir davomida hokimiyatdan charchaganini ma’lum qildi. Uning so‘zlariga ko‘ra, respublika uchun yangi kuchlar va yangi rahbarlar foydali bo‘lishi mumkin.

“Yangi kuchlar, yangi odamlar qiziqarliroq bo‘lardi. Agar boshqa odamlar kelsa, vaziyat yaxshilanishi mumkin”, — dedi Qodirov kelgusi yildagi saylovlarda ishtirok etish ehtimoli haqidagi savolga javob bera turib.

U avvalroq 2026-yilda bo‘lib o‘tadigan saylovlarda ishtirok etishga tayyor ekanini bildirgan edi. Biroq bu qaror Rossiya rahbari tomonidan taklif qilinsa va mahalliy aholi qo‘llab-quvvatlasa, amalga oshishini ta’kidlagandi.

Ramzan Qodirov shu yil bahorda ham iste’foga chiqish istagi borligini aytgan va o‘z lavozimini tark etishga umid qilayotganini ma’lum qilgan edi. Keyinchalik u bu masalada mustaqil qaror qabul qila olmasligini, iste’fo faqat Rossiya prezidenti tomonidan qabul qilinishi mumkinligini izohlagan.

Qodirov o‘zini “piyoda askar” deb atab, berilgan buyruqlarni bajarishini aytgan. Uning ta’kidlashicha, qaror qabul qilish vakolati unga emas, Kremlga tegishli.

Checheniston rahbarining bu bayonoti so‘nggi yillarda uning salomatligi va siyosiy kelajagi haqidagi muhokamalar kuchaygan bir paytda yangradi. Rasmiy jihatdan esa Qodirov o‘z lavozimida qolmoqda va Checheniston boshqaruvini davom ettirmoqda.

• Chechiniston
• Ramzan Qodirov