Checheniston rahbari Ramzan Qodirovning qizi Ayshat Qodirova bosh vazirning ijtimoiy blok bo‘yicha o‘rinbosari etib tayinlandi. Bu haqda mamlakat prezidenti o‘zining telegram kanalida ma’lum qildi.

Bungacha Ayshat Qodirova respublika madaniyat vaziri lavozimida ishlab kelayotgan edi. Endi uning o‘rnini Checheniston bosh vazirining sobiq o‘rinbosari Musa Dadayev egallaydi. Checheniston rahbarining aytishicha, qizini bu lavozimga tayinlash taklifi respublika hukumati raisi Muslim Xuchiyev tomonidan ilgari surilgan.

“Albatta, Ayshat Qodirova viloyat Madaniyat vazirligi faoliyatini takomillashtirishga katta hissa qo‘shgan va katta ish tajribasini to‘plagan”, – deydi Ramzan Qodirov.

4-sentyabr kuni Putin Ayshat Qodirovani II darajali “Vatan oldidagi xizmatlari uchun” ordeni bilan taqdirlagandi. Hujjatga ko‘ra, 24 yoshli Qodirova bir qancha odamlar qatori “milliy madaniyat va san’atni rivojlantirishdagi xizmatlari, ko‘p yillik samarali ijodiy faoliyati uchun” taqdirlangan.

Ayshat Qodirova 2021-yilning oktyabridan Checheniston madaniyat vaziri lavozimida ishlab kelayotgandi. Bungacha u bir yil Checheniston Madaniyat vazirligi rahbarining birinchi o‘rinbosari sifatida faoliyat olib borgan.

• Checheniston
• Ramzan Qodirov