2026-yil futbol bo‘yicha jahon chempionati boshlanishi arafasida ijtimoiy tarmoqlar, internet saytlari hamda Telegram messenjeridagi guruh va kanallarda bukmekerlik xizmatlari, qimor o‘yinlari va tavakkalchilikka asoslangan boshqa o‘yinlarni targ‘ib qiluvchi reklama materiallari tarqalishi faollashishi kuzatilmoqda.

Yirik sport musobaqalariga bo‘lgan qiziqishning ortishi ayrim shaxslar tomonidan fuqarolarni turli bukmekerlik platformalariga jalb etish vositasi sifatida qo‘llanilmoqda. Bunda sport natijalari bo‘yicha pul tikish, qisqa muddatda daromad topish yoki yirik yutuqlarga erishish haqidagi va’dalar orqali aholini tavakkalchilikka asoslangan o‘yinlarda ishtirok etishga undovchi reklama va axborot materiallari keng tarqatilmoqda.

Alohida ta’kidlash joizki, O‘zbekiston Respublikasi “Reklama to‘g‘risida”gi Qonunining 46-moddasiga muvofiq, qimor o‘yinlari va tavakkalchilikka asoslangan boshqa o‘yinlar, shu jumladan telekommunikatsiya tarmoqlari hamda Internet jahon axborot tarmog‘idan foydalangan holda tashkil etiladigan qimor o‘yinlari va tavakkalchilikka asoslangan boshqa o‘yinlarni reklama qilish taqiqlanadi.

Shuningdek, bukmekerlik xizmatlari va qimor o‘yinlarini targ‘ib qilish, ularning reklamasini tayyorlash, joylashtirish, tarqatish yoki ommalashtirish bilan bog‘liq harakatlar amaldagi qonunchilik hujjatlarida belgilangan tartibda javobgarlikka sabab bo‘lishi mumkin.

O‘rganishlar shuni ko‘rsatmoqdaki, bukmekerlik xizmatlarini targ‘ib qiluvchi ayrim shaxslar o‘z faoliyatini anonim tarzda yuritish, soxta akkauntlar va taxalluslardan foydalanish hamda xorijiy elektron platformalar orqali reklama tarqatishga urinmoqda. Biroq bu kabi holatlar qonunchilik talablaridan chetda qolmaydi va vakolatli organlar tomonidan o‘rganib boriladi.

Raqobat qo‘mitasi tomonidan o‘z vakolatlari doirasida internet tarmog‘i, ijtimoiy media platformalari va boshqa axborot resurslarida joylashtirilayotgan reklama materiallarining amaldagi qonunchilik talablariga muvofiqligi yuzasidan tizimli monitoring va tahlil ishlari olib borilmoqda.

Aniqlangan qonunbuzilish holatlari bo‘yicha tegishli ma’lumotlar vakolatli davlat organlariga, jumladan O‘zbekiston Respublikasi Ichki ishlar vazirligining Kiberxavfsizlik bo‘linmalariga qonunchilikda belgilangan choralarni ko‘rish uchun taqdim etiladi.

• Qimor
• raqobat
• reklama