Murojaatda Uzbekistan Airways AJ aviakompaniyasining Anqara–Toshkent reysida yo‘lovchining sog‘ligi uchun muhim bo‘lgan maxsus (glyutensiz) ovqat yetkazib berilmaganligi ta’kidlangan.

Bundan tashqari, samolyot salonining sanitariya-gigiyena holati talabga javob bermagani – yo‘lovchi o‘tirgan joyda oldingi reysdan qolgan chiqindilar mavjudligi ham ko‘rsatib o‘tilgan.

Yo‘lovchi chipta sotib olish chog‘ida o‘z sog‘lig‘i bilan bog‘liq vaziyatni oldindan aviakompaniya bilan kelishib olgan va aviakompaniya ushbu maxsus ovqat reysda ta’minlanishini kafolatlagan edi. Biroq, parvoz kuni bu talab bajarilmagan.

Qo‘mita tomonidan Uzbekistan Airways AJ aviakompaniyasiga yuborilgan so‘rov bo‘yicha xizmat tekshiruvi o‘tkazilgan.

Natijada yo‘lovchi haq ekanligi, maxsus ovqatni Anqara aeroportidagi keytering xizmati tomonidan yetkazib berilmaganligi tasdiqlangan.

Shundan so‘ng, yo‘lovchiga yetkazilgan ma’naviy va moddiy zararni qoplash maqsadida aviakompaniya tomonidan iste’molchining keyingi reysida xizmat ko‘rsatish klassini biznes-klassga oshirish to‘g‘risidagi qaror qabul qilinib, manfaati himoya qilinishi ta’minlandi.

Bundan tashqari, samolyot salonidagi sanitariya-gigiyena holati bo‘yicha ham mas’ul tashkilotga qo‘shimcha nazorat choralari o‘rnatilishi belgilandi.

• Murojaat
• Uzbekistan airways