Bugun Toshkent shahrida O‘zbekiston “Adolat” sotsial-demokratik partiyasi Siyosiy Kengashining XII Plenumi bo‘lib o‘tdi.

Unda partiya Siyosiy Kengashi hamda Ijroiya qo‘mitasi a’zolari, Oliy Majlis Qonunchilik palatasi deputatlari, senatorlar, mahalliy Kengash deputatlari, partiya faollari va ommaviy axborot vositalari vakillari ishtirok etdi.

Plenumda tashkiliy masala ko‘rilib, O‘zbekiston “Adolat” sotsial-demokratik partiyasi Siyosiy Kengashi raisi Bahrom Abduhalimov o‘z arizasiga muvofiq, Siyosiy Kengash a’zolarining ochiq ovoz berish yo‘li bilan partiya Siyosiy Kengashi raisi lavozimidan ozod etildi.

So‘zga chiqqanlar Bahrom Abduhalimov raisligida “Adolat” SDP faoliyatida sezilarli ijobiy o‘zgarishlar bo‘lganini ta’kidlab o‘tdilar.

Shuningdek, bugungi kunda partiya tarkibida 7338 ta boshlang‘ich partiya tashkilotlari faoliyat yuritmoqda, ularning faoliyati joylarda 208 ta tuman va shahar, 14 ta hududiy partiya Kengashlari tomonidan muvofiqlashtirib borilmoqda.

Maxmudova Robaxon Anvarovna partiya Siyosiy Kengashi raisi lavozimiga Siyosiy Kengash a’zolari tomonidan ochiq ovoz berish yo‘li bilan saylandi.

Plenumda so‘z olganlar, Robaxon Anvarovna huquqshunos sifatida o‘z hayoti va faoliyati davomida adolatni qaror toptirish va qonun ustuvorligini ta’minlashda faol qatnashib kelayotganligi, yuksak insoniy fazilatlari, vatanparvarligi, uning “Adolat” sotsial-demokratik partiyasi Siyosiy Kengash raisi lavozimiga to‘g‘ri tanlanganligini alohida ta’kidlab o‘tishdi.

Plenumda, partiya Siyosiy Kengashi va Ijroiya qo‘mitasi a’zolari tarkibiga o‘zgartirishlar kiritish masalasi ham ma’qullandi.

Plenum kun tartibidagi navbatdagi masala O‘zbekiston “Adolat” sotsial-demokratik partiyasi faoliyatining 2023-yil yakunlari va partiyaning 2024-yilgi dasturiy vazifalari to‘g‘risida axborot berildi.

• "Adolat" partiysi