Rossiya Ispaniya diplomatik missiyasining 27 nafar xodimini mamlakatdan chiqarib yuboradi. Bu haqida Rossiya TIV xabar bermoqda. Rasmiy nota 18-may kuni tushdan keyin Rossiya Tashqi ishlar vazirligiga chaqirilgan Ispaniyaning Moskvadagi elchisi Markos Gomes Martinezga topshirilgan.

Vazirlikning qayd etishicha, bu do‘stona bo‘lmagan qadam Rossiya-Ispaniya munosabatlariga salbiy ta’sir qiladi.

“Javob sifatida Ispaniyaning Moskvadagi elchixonasi va Sankt-Peterburgdagi Ispaniya bosh konsulligining 27 nafar xodimi “persona non grata” deb e’lon qilindi. Ular nota topshirilgan paytdan boshlab yetti kun ichida mamlakat hududini tark etishlari shart”, – deyiladi Rossiya TIV matbuot xizmati xabarida.

Ma’lumot uchun, joriy yil aprel oyi boshida Ispaniya rasmiylari mamlakat xavfsizligi manfaatlariga tahdid solayotgan Rossiya diplomatik missiyasi xodimlarini chiqarib yuborish haqida eʼlon qilgan edi.

• Diplomatik
• Ispaniya
• Jahon
• Rossiya