Rossiya banki rossiyaliklarning chet eldagi yaqin qarindoshlari hisob raqamlariga o‘tkazmalarini oyiga 5000 dollar miqdorida cheklashga qaror qildi. Bu haqda “Kommersant” xabar berdi. 

Ma’lum qilinishicha, cheklov rezident jismoniy shaxslarning o‘z hisob varaqlaridan turmush o‘rtog‘i, yaqin qarindoshlari (ota-ona, farzand, bobo, buvi, nevaral), to‘liq va o‘gay opa-singillar va aka-ukalar, farzandlikka oluvchilar va asrab olingan bolalarga o‘tkazmalar uchun joriy qilingan.

“Bu zaruriy chora va valyutaning mamlakatdan chiqib ketmasligi, hozirgi vaziyatda rubl kursiga qo‘shimcha bosim o‘tkazmasligi uchun amalga oshirilmoqda”, – deydi Fitch moliyaviy institutlari tahliliy guruhi katta direktori Anton Lopatin.

Qayd etilishicha, Markaziy bank hududiy banklarga Rossiyaga qarshi sanksiyalar qo‘ygan mamlakatlarning norezidentlari uchun Rossiyadan chet elga pul o‘tkazmalarini amalga oshirishni ham taqiqlagan edi. 

Boshqa mamlakatlardan kelgan norezidentlar uchun oyiga 5000 AQSh dollari miqdorida pul olish limitini joriy etishga qaror qilindi. Taqiq joriy yil 1-martdan 31-martgacha amal qiladi va jismoniy va yuridik shaxslarga ham tegishli.

Ma’lumot uchun, 28-fevral kuni Vladimir Putin rezidentlarga Rossiyadan o‘z hisob raqamlariga va xorijdagi bank va brokerlardagi depozitlariga xorijiy valyutani olib chiqishni taqiqlovchi farmonni imzolagan edi. 
 

• Bank
• O‘zbekiston
• Rossiya
• Sberbank