Rossiya bugundan Finlandiyaga elektr energiyasi yetkazib berishni to‘xtatadi. Bu isteʼmolchi davlatning to‘lovlar bilan bog‘liq muammoni hal etmagani sabab sodir bo‘lgan. Qayd etilishicha, bu holat 20 yillik hamkorlik davomida birinchi marta kuzatilmoqda.

Bu haqda Rossiyaning “Inter RAO” elektr energiyasi kompaniyasi maʼlum qildi.

Finlarning tarmoq operatori Fingrid to‘lovlar bilan bog‘liq vaziyatga izoh bermagan. Ammo mahalliy ishlab chiqarish hajmini oshirish hamda Shvetsiyadan yetkazib beriladigan elektr energiyasi hisobiga Rossiya tomoni to‘xtatib qo‘ygan taqchillikni qoplash mumkinligiga urg‘u bergan.

O‘z navbatida Rossiya tomoni agar to‘lovlar amalga oshirilsa, yetkazib berish qayta tiklanishi haqida maʼlum qilgan.

Maʼlumot uchun, Finlandiya ehtiyojlarining 10 foizinigina Rossiya yetkazib beradigan elektr energiyasi bilan qoplab kelgan.

• Eksport
• Elektr energiyasi
• Finlandiya
• Rossiya