Checheniston rahbari Ramzan Qodirov bugun, 29-oktyabr kuni respublikadagi Rossiya maxsus kuchlari universiteti dron hujumiga uchraganini ma’lum qildi. Bu haqda Qodirov o‘zining Telegram kanalida xabar berdi.

“Bugun ertalab soat 6:30 da Gudermesda uchuvchisiz qurilma hujumi natijasida Rossiya maxsus kuchlari universiteti hududidagi bo‘sh binoning tomi yonib ketdi. Qurbonlar va jabrlanganlar yo‘q. Yong‘in o‘chirilgan”, – dedi Qodirov.

Qayd etilishicha, hozirda tergov organlari hujum yuzasidan tekshiruv olib bormoqda. Universitet faoliyati to‘xtatilmagan, barcha xizmatlar odatdagi tartibda ishini davom ettirmoqda.

Ma’lumot uchun, Rossiya maxsus kuchlari universiteti jangovar zonalarga yuborish uchun harbiylarni ham tayyorlaydi. Ommaviy axborot vositalari uni Rossiyadagi eng yirik yollash markazlaridan biri sifatida tilga oladi.

• Checheniston
• Ramzan Qodirov