Rossiyaning Samara viloyatida Amir Temurga atab haykal o‘rnatiladi. Bu haqda “Harbiy tarixni o‘rganish borasidagi ishlar samaradorligini oshirish chora-tadbirlari to‘g‘risida”gi Hukumat qarorida belgilab qo‘yilmoqda.

Haykal 2023-yilga qadar har yili ajratiladigan byudjet mablag‘lari doirasida, byudjetdan tashqari mablag‘lar va qonunchilikda taqiqlanmagan boshqa mablag‘lar hisobidan o‘rnatilishi kerak. 

Qarorga muvofiq, Rossiyaning Samara viloyatidagi Kodurcha vohasida mahalliy o‘lkashunoslar tomonidan Amir Temurga bag‘ishlab o‘rnatilgan yodgorlik toshi o‘rnida Amir Temur va uning harbiy sarkardalari ifodalangan kompozitsion haykal o‘rnatish bo‘yicha ko‘rik-tanlov e’lon qilinadi hamda tanlov natijalariga ko‘ra g‘olib bo‘lgan haykal majmuasini o‘rnatish yuzasidan Rossiya Tashqi ishlar vazirligi va Madaniyat vazirligi bilan memorandum tuzish ishlari olib boriladi.

Shuningdek, O‘zbekiston Respublikasi jangovar ordeni sohiblari tug‘ilib o‘sgan yoki istiqomat qilayotgan joylarda mahalliy ko‘ngillilar tomonidan esdalik lavhalari, yodgorlik toshlarini o‘rnatish ham nazarda tutilmoqda.

• Amir_Temur
• Rossiya