Rossiyaga 90 kundan ortiq muddatga kelgan xorijliklar hamda mehnat muhojirlari uchun amal qiluvchi yangi qoidalarga hujjat bugun, 29-dekabrdan kuchga kirdi.

Unga ko‘ra, Rossiya Federatsiyasiga mehnat faoliyatini amalga oshirish bilan bog‘liq bo‘lmagan maqsadlarda 90 kalendar kundan ortiq muddatga kelgan chet el fuqarolari mamlakatga kirgan kundan boshlab ushbu muddat ichida barmoq izini davlat ro‘yxatidan o‘tkazishi majburiydir.

Shuningdek:

– Rossiyaga 90 kundan ortiq muddatga kelgan mehnat muhojirlari va xorijliklar OIV, giyohvandlik va bir qator yuqumli kasalliklar bo‘yicha tekshiruvdan o‘tishlari shart.

Tibbiy ma’lumotnomalar 3 oy ichida Rossiya Ichki ishlar vazirligiga topshirilishi kerak, ular bir yil davomida amal qiladi, keyin testlar qayta topshiriladi.

OIV testini Rossiya hududida topshirish kerak.

– chet el fuqarolari suratga olish va barmoq izlarini olishlari shart. Bunda 90 kundan ortiq muddatga kelganlar – kirgan kundan boshlab 90 kun ichida, mehnat muhojirlari esa – 30 kun ichida yoki ishlash uchun hujjatlarni olgandan keyin.

Buning uchun Rossiya Ichki ishlar vazirligining hududiy organi, tasarrufidagi korxona yoki vakolatli tashkilotga shaxsan murojaat qilinadi.

– Biometrik ma’lumotlarning yetkazib berilganligini tasdiqlovchi hujjatlar, iloji bo‘lsa, chipli karta ko‘rinishida beriladi – u yerda ism-sharif, tug‘ilgan sana, jinsi, fuqaroligi va pasport ma’lumotlari qayd etiladi. Shuningdek, fotosurati va barmoq izlarining tasviri ham bo‘ladi.

Mehnat patentlari ham migrantlarga biometrik ma’lumotlarga ega elektron chipli kartalar ko‘rinishida beriladi.

Kartaning old tomonida egasining fotosurati, uning ismi-sharifi, tug‘ilgan yili, fuqaroligi, pasport raqami va kasbi, orqa tomonida esa ish joyi hamda patent berilgan joy va sana, chipda egasining biometrik ma’lumotlari, ya’ni yuzining elektron tasviri va barmoq izlari bo‘ladi.

• Migratsiya
• Rossiya