Tashqi mehnat migratsiyasi agentligi tomonidan Xorijda mehnat faoliyatini amalga oshiruvchi fuqarolarni qoʻllab-quvvatlash hamda ularning huquq va manfaatlarini himoya qilish jamgʻarmasi mablagʻlari hisobidan ikki fuqaro Oʻzbekistonga qaytarilgan. Bu haqda Tashqi migratsiya agentligi xabar berdi.

Qayd etilishicha, qoraqalpogʻistonlik S.M. 2020-yilning dekabr oyida Rossiyaga ishlash maqsadida borib, joriy yil sentyabr oyida sogʻligʻi keskin yomonlashgani oqibatida mehnatga layoqatsiz boʻlib qolgan.

Shuningdek, joriy yilning sentyabr oyida Moskva shahriga ishlash uchun borgan namanganlik 51 yoshli J.B. baxtsiz hodisa sababli oyogʻidan ogʻir jarohat olgan.

Tashqi mehnat migratsiyasi agentligi ushbu fuqarolarni Xorijda mehnat faoliyatini amalga oshiruvchi fuqarolarni qoʻllab-quvvatlash hamda ularning huquq va manfaatlarini himoya qilish jamgʻarmasi mablagʻlari hisobidan 19 va 21-noyabr kunlari Moskva – Toshkent aviareyslari orqali Oʻzbekistonga qaytargan.

Maʼlum qilinishicha, fuqarolar Agentlik xodimlari tomonidan Toshkent xalqaro aeroportida tez tibbiy yordam brigadasini jalb qilgan holda kutib olinib, Respublika shoshilinch tez tibbiy yordam ilmiy markaziga kuzatib qoʻyilgan.

• Migratsiya
• O‘zbekiston
• Rossiya