Rossiya Federatsiyasiga vaqtinchalik mehnat faoliyatini amalga oshirish uchun ketib, sentyabr oyida umurtqa pogʻonasidan ogʻir tan jarohati olgan holda jarrohlik amaliyotini boshidan kechirgan fuqaro Oʻzbekistonga qaytarildi.  Bu haqda Tashqi mehnat migratsiyasi agentligi maʼlum qildi. 

Qayd etilishicha, Tashqi mehnat migratsiyasi agentligining Moskva shahridagi vakolatxonasiga Andijon viloyatidan I.M. Oʻzbekistonga qaytishda amaliy yordam soʻrab murojaat qilgan. 

Ushbu murojaat boʻyicha oʻrganish ishlari olib borilganda, M.I. joriy yilning may oyida vaqtinchalik mehnat faoliyatini amalga oshirish uchun Rossiya Federatsiyasining Ryazan shahriga ketganligi, ammo sentyabr oyida velosiped haydayotganda chuqurlikka yiqilishi oqibatida umurtqa pogʻonasidan ogʻir tan jarohati olganligi va jarrohlik amaliyotini boshidan kechirganligi aniqlangan.

Taʼkidlanishicha, bugungi kunda fuqaro mustaqil harakatlana olmasligi va mehnat qobiliyatini yoʻqotganligi sababli davolanish jarayonini davom ettirish maqsadida Vatanga qaytish uchun yordam soʻragan.

Maʼlum qilinishicha, agentlikning tashabbusi bilan fuqaro 8-noyabr kuni Xorijda mehnat faoliyatini amalga oshiruvchi fuqarolarni qoʻllab-quvvatlash hamda ularning huquq va manfaatlarini himoya qilish jamgʻarmasi mablagʻlari hisobidan Moskva – Toshkent aviareysi orqali Vatanga qaytarilgan.

• Migratsiya
• Rossiya