Rossiya Federatsiyasining Volgograd viloyatida ish beruvchi shaxs, ishlash maqsadida borgan O‘zbekiston fuqarolarini kaltaklab, ishlashga majbur qilganligi aniqlandi. Bu haqda Tashqi mehnat migratsiyasi agentligi matbuot xizmati xabar berdi.

Qayd etilishicha, o‘zbekistonlik fuqarolar rossiyalik ish beruvchi tomonidan barcha hujjatlari olib qo‘yilib, ularga kuch ishlatilgan va majburiy mehnatga jalb qilingan. Hatto qilgan mehnatlari uchun oylik maosh ham berilmagan. 

Tashqi mehnat migratsiyasi agentligining Volgograd shahridagi vakili ushbu murojaatni o‘rganish maqsadida zudlik bilan Volgograd viloyati ichki ishlar boshqarmasi rahbariyati bilan korxonaga reyd uyushtirgan. Reyd davomida viloyatning barcha huquqni muhofaza qiluvchi organlari xodimlari ishtirok etgan.

Natijada ish beruvchi hibsga olinib, jinoiy javobgarlikka tortildi. O‘zbekiston fuqarolarining pasport va oylik maoshlari olib berildi.

• Majburiy_mehnat
• Migratsiya
• O‘zbekiston
• Pasport
• Rossiya
• hujjat