Ishlab chiqarishdagi baxtsiz hodisa oqibatida Rossiya federatsiyasida vafot etgan Oʻzbekiston fuqarosiga 1 mln. 161 ming rubl undirib berildi. Bu haqda Tashqi mehnat migratsiyasi agentligi xabar berdi.

Qayd etilishicha, mehnat migrantlarining huquqlarini himoya qilish maqsadida Tashqi mehnat migratsiyasi agentligi xorijiy advokatlik tashkilotlari (Rossiyada 18 ta, Qozogʻistonda 4 ta, Turkiyada 3 ta) bilan shartnomalar imzolagan.

1994-yilda tugʻilgan Oʻzbekiston fuqarosi B.Yusupov Rossiyaning “MONOTEK STROY” MChJda ish boshlaganidan 2 oy 5 kun oʻtib, 2020-yil 21-sentyabr kuni ishlab chiqarishdagi baxtsiz hodisa oqibatida vafot etadi. 

Uning Xorazm viloyatida ota-onasi bilan birga yashovchi 1995-yilda tugʻilgan turmush oʻrtogʻi va 2019-yilda tugʻilgan qizi qoladi.

Keltirilishicha, marhumning oilasiga zararni undirib berish boʻyicha Oʻzbekiston Respublikasi Vazirlar Mahkamasi, Bandlik va mehnat munosabatlari vazirligi, Tashqi mehnat migratsiyasi agentligi tomonidan rossiyalik yuristlar jamoasi jalb etilib, uzoq davom etgan jarayonlardan soʻng, 1 mln. 161 ming rubl (15 774 AQSh dollari) mablagʻ toʻlab berish boʻyicha ish beruvchi bilan yuridik kelishuvga erishilgan.

Shuningdek, Rossiya qonunchiligiga muvofiq, marhumning oilasiga jabrlanuvchining ish joyida baxtsiz hodisa oqibatida vafot etgani munosabati bilan 1 mln. rubl atrofida kompensatsiya berilishi ham koʻzda tutilgan.

Maʼlum qilinishicha, hozirgi vaqtda Rossiya Federatsiyasi Ijtimoiy sugʻurta jamgʻarmasidan ushbu mablagʻni undirish va marhumning voyaga yetmagan qiziga 18 yoshga toʻlgunga qadar nafaqa tayinlash masalasi hal qilinmoqda.

• Migratsiya
• O‘zbekiston
• Rossiya