Tashqi mehnat migratsiya agentligi Rossiyadagi qurilish obyektlariga ishlash uchun ketgan Oʻzbekiston fuqarolari qancha maosh olishini maʼlum qildi.

Unga koʻra, ish haqi oyiga “ish miqdoriga qarab” 40 ming rubl atrofida boʻladi. Sinov tariqasida endilikda oʻzbekistonliklarga qurilish sohasida 60 ta mutaxassislik ish oʻrinlari taklif etilmoqda.

Qayd etilishicha, ishga qabul qilish Rossiyaning oʻnta mintaqasi boʻylab — Moskva, Sankt-Peterburg, Amur, Novosibirsk, Kaluga, Tula, Murmansk, Kaliningrad va Moskva viloyatlarida, shuningdek, Krasnodar oʻlkasida ham amalga oshiriladi.

U yerdagi barcha ishchilarga chet el pasportlarini tezroq berish vaʼda qilingan. Oʻz navbatida fuqarolarga mehnat patenti Oʻzbekistonning oʻzida berilishi kutilmoqda. 

Oktyabr oyi boshida Rossiya bosh vaziri Mixail Mishustin Oʻzbekistondan 10 ming mehnat muhojirini Rossiyadagi qurilish obyektlariga olib kelish boʻyicha tajriba dasturini ishga tushirish haqidagi farmonni imzolagan edi.

2022-yil yanvar oyi oʻrtalarigacha ushbu parvozlarning amalga oshirilishi kutilmoqda.

Oʻzbekistonlik mehnat muhojirlari 21 ta qurilish kompaniyasi tomonidan tanlab olinadi. Shu bilan birga, ruxsatnomalar berishning ayrim tartiblari respublikamizning oʻzida oʻtkazildi.

• Migratsiya