O‘zbekistonning Rossiyadagi elchixonasi diplomatlari Tula viloyatidagi Xorijiy fuqarolarni vaqtinchalik saqlash markaziga tashrif buyurib, Rossiya tomoni bilan qator masalalar bo‘yicha ikki tomonlama muzokaralar o‘tkazdi. Bu haqda “Dunyo” axborot agentligi xabar berdi.

Elchixona bosh konsuli Mehriddin Xayriddinov muassasada saqlanayotgan o‘zbekistonliklarning yashash va ovqatlanish sharoitlari bilan tanishdi. Aniqlangan muammo va kamchiliklar bo‘yicha esa Rossiya tomoni bilan qator ikki tomonlama muzokaralar o‘tkazdi.

Xorijiy fuqarolarni vaqtinchalik saqlash markazi va Rossiya Ichki ishlar vazirligining viloyat boshqarmasi vakillari bilan bo‘lib o‘tgan muloqot davomida O‘zbekiston fuqarolarining hujjatlarini tezkorlik bilan rasmiylashtirish va ularni qisqa fursatda O‘zbekistonga qaytarish masalalari muhokama qilingan.

Agentlikning yozishicha, olib borilgan muzokaralar natijasida markazda uzoq vaqtdan buyon saqlanib kelinayotgan bir guruh O‘zbekiston fuqarolarini yaqin kunlarda o‘z vatanlariga qaytarish bo‘yicha kelishuvga erishilgan.

• Fuqarolik
• O‘zbekistonlik
• Rossiya