Rossiyaning Kiyev va boshqa viloyatlardagi yangi qator raketa hujumlaridan so‘ng Ukrainaning millionlab aholisi elektr va suvsiz qoldi. Bu haqda BMT matbuot xizmati xabar qildi.

BMT matbuot kotibi Stefan Dyujarrikning soʻzlariga koʻra, Odessada elektr uzatish liniyalari shikastlangani sababli suv taʼminoti uzilib qolgan, chunki suv stansiyalari energiyasiz ishlamaydi. U yerda, shuningdek, Dneprda, isitish tizimi ham shikastlangan. Bundan tashqari, Kiyev viloyatining 40 foizga yaqini elektr energiyasisiz qolgan.

“Gumanitar sohadagi hamkasblarimiz qayd etishicha, hujumlar Ukrainaning energetika tizimiga qo‘shimcha zarar yetkazgan, mamlakatning ko‘p qismini sovuq bosib ketgan va Kiyevda havo harorati minus sakkiz darajagacha tushgan”, — dedi Dyujarrik.

Uning ta’kidlashicha, energetika tizimiga davom etayotgan hujumlar millionlab tinch aholi, ayniqsa frontga yaqin hududlardagi vaziyatni yanada og‘irlashtirmoqda. Kelayotgan sovuq ob-havo fonida odamlar yorug֮‘lik, issiqlik va suvsiz qoldi.

Gumanitar tashkilotlar Ukraina hukumatini inqiroz holatida aholi boshpana topishi mumkin bo‘lgan shifoxonalar va issiqlik punktlariga generatorlar yetkazib berish orqali qo‘llab-quvvatlashda davom etmoqda.

“Biz allaqachon 400 ta generatorni yetkazib berdik va yana tez orada yetib kelishi kerak. Shuningdek, 630 ming kishini issiq kiyim, isitish moslamalari va binolarni ta’mirlash uchun materiallar bilan ta’minladik”,– dedi Dyujarrik.

• BMT
• Qish mavsumi
• Rossiya
• Ukraina