Joriy yilning 2-yanvarida Qozog‘istonning Mangistau viloyatida gaz narxlarining oshirilishi munosabati bilan boshlangan ommaviy namoyish 4-yanvarga kelib mamlakatning g‘arbiy va markaziy viloyatlarigacha yoyildi.

Qozoqlar dastlab gaz narxining tushirilishini talab qilgan bo‘lsa, namoyish va mitinglar ko‘lamini kengayishi fonida talablar ham siyosiylashib ketdi: xalq Hukumat iste’fosini hamda Elboshi – Nursulton Nazarboyevning siyosatdan ketishini talab qila boshladi.

Kecha kechqurun Hukumat gaz narxini tushirganini e’lon qildi, bugun tongda esa mamlakat prezidenti Asqar Mamin boshchiligidagi Hukumatni iste’foga chiqarganini e’lon qildi.

Shuningdek, bugun erta tongdan Mangistau viloyati va Olmaota shahrida 19-yanvargacha favqulodda holat joriy etildi.

“Rus matbuoti Qozog‘istondagi voqealarni o‘zgacha ishtiyoq bilan yorityapti...”

Mazkur voqea MDH davlatlari, jumladan, rus matbuoti tomonidan faol yoritib borilmoqda.

Iqtisodchi-bloger Otabek Bakirov ushbu holatga e’tibor qaratib, rus matbuotining Qozog‘istondagi voqealarni “o‘zgacha ishtiyoq bilan” yoritayotganini yozadi.

“Bo‘layotgan voqealarda albatta ichki omil va yo‘l qo‘yilgan xatolar asosiy, lekin tashqi triggerni esdan chiqarmaslik lozim.

Kreml nazorati ostidagi OAVlar, garchi Rossiyada uzun ta’til bo‘lishiga qaramay, voqealarni faol, hatto ishtiyoq bilan yoritayetgani sergaklantiradi”, – deya xavotirini bildiradi Bakirov.

Shuningdek, bloger gaz narxining ko‘o‘tarilishi voqeasida qozoq xalqi nega Nazarboyevni aybdor qilyapti, degan savolni o‘rtaga qo‘yadi.

“Aloqasi bor. Gaz monopolisti Kaztransgazga Dariga Nazarbayevaning fuqaroviy eri Qayrat Sharipbayev boshchilik qiladi.

Hech bir muloqot va kelishuvlarsiz gaz narxlarini oshirish harakatida Xalq Nazarboyevning qo‘lini ko‘rayapti”, – deb yozadi Otabek Bakirov.

Shuningdek, yana bir jamoatchilik faoli Xushnudbek Xudoyberdiyev ham qo‘shni davlatda kuzatilayotgan voqea-hodisalarga munosabat bildirib, qardosh qozoq xalqiga tinchlik tilashini, ko‘tarilgan masalalar tezroq o‘z yechimini topib, tashqi dushmanlarga qo‘l keladigan urush-janjallar barham topishini tilaydi.

“Chunki Qozog‘istondagi voqealarni ayrim davlatdagi OAVlar shubhali tarzda juda faol yoritib borishmoqda. O‘sha davlatdagi (nomini aytmasam bildingiz) ayrim "siyosatchilar" esa Qozog‘iston hududidagi o‘z millatdoshlarini qutqarish, buning uchun o‘sha davlatdagi yerlarni ajratib olish haqida muhokamalarni boshlab yuborishgan”, – deb yozadi u.

• Gaz
• Namoyish
• Qozog‘iston