13-dekabr kuni Qirg‘iziston Prezidenti Sadir Japarov Madaniyat vaziri Ozodbek Nazarbekovni qabul qildi.

“Xalqlarimizni ko‘p asrlik do‘stlik va yaxshi qo‘shnichilik rishtalari birlashtirib turadi. 1992-yilda diplomatik munosabatlar o‘rnatilganidan buyon ikki tomonlama aloqalar yangi bosqichga ko‘tarildi va bu hamkorlikni mustahkamlashda madaniyat muhim o‘rin tutadi”, – degan Sadir Japarov.

Qirg‘iziston Prezidenti Sadir Japarov 2025-yilda Qirg‘izistonda bo‘lib o‘tadigan O‘zbekiston madaniyati kunlari ikki xalqning yanada yaqinlashishida muhim voqea bo‘lishiga ishonch bildirdi.

Sadir Japarov Ozodbek Nazarbekovni “Qirg‘iziston Respublikasi xalq artisti” unvoni bilan taqdirlangani bilan tabriklab, uning mamlakatlar o‘rtasidagi madaniy aloqalarni rivojlantirish va do‘stlikni mustahkamlashga qo‘shgan ulkan hissasini ta’kidladi.

“Ijodiy yo‘lingiz ko‘pchilikni ilhomlantiradi. 15-dekabr kuni To‘qto‘g‘ul Satilganov nomidagi Qirg‘iziston milliy filarmoniyasida bo‘lib o‘tadigan sizlar ishtirokidagi musiqiy kecha umumiy madaniy hamjihatligimizning yana bir yorqin namunasi bo‘ladi”, — degan Qirg‘iziston Prezidenti Sadir Japarov.

Ozodbek Nazarbekov uning faoliyatiga berilgan sharaf va yuksak baho uchun samimiy minnatdorlik bildirib, ikki mamlakat xalqlari o‘rtasidagi qardoshlik munosabatlarini mustahkamlashga intilishini alohida ta’kidladi.

• Ozodbek Nazarbekov
• Qirg‘iziston
• Sadir Japarov