Oliy Majlis Qonunchilik palatasida 12-yanvar kuni O‘zbekiston Liberal-demokratik partiyasi fraksiyasi yig‘ilishi bo‘lib o‘tdi. Unda “Samarqand viloyatining Samarqand tumanini tugatish, Oqdaryo, Past Darg‘om, Toyloq tumanlari va Samarqand shahri chegaralarini o‘zgartirish to‘g‘risida”gi qaror loyihasi ko‘rib chiqildi.

Qaror loyihasi Samarqandni “millionli shahar”ga aylantirish, zamonaviy arxitektura yechimlariga ega turar joy va noturar binolarni barpo etish, aholining uy-joyga bo‘lgan talabini to‘liq qondirish hamda hududlarni infratuzilma bilan ta’minlash orqali munosib yashash sharoitlarini yaratishga qaratilgan. Shu maqsadda Samarqand tumani alohida ma’muriy-hududiy birlik sifatida tugatilishi ko‘zda tutilmoqda.

Fraksiya a’zosi Diyor Husanovning ta’kidlashicha, chegaralar o‘zgartirilishi natijasida Samarqand shahri hududi 11,8 ming gektardan 28,9 ming gektargacha kengayadi. Bu esa yangi investitsiya va qurilish loyihalari uchun keng imkoniyatlar yaratib, turistik loyihalar, o‘yin maydonlari, akvaparklar, havo sharlari, istirohat bog‘lari kabi ko‘ngilochar va dam olish maskanlarini barpo etish, shuningdek, yashil hududlar, xizmat ko‘rsatish obyektlari hamda logistika markazlari qurilishiga zamin bo‘ladi.

Shuningdek, yarim tayyor zargarlik buyumlarini O‘zbekiston Respublikasi bojxona hududidan tashqariga olib chiqish tartibini takomillashtirishga qaratilgan qonun loyihasi ham muhokama qilindi. Asosiy elektorati tadbirkorlardan iborat fraksiya a’zolari ushbu hujjatga alohida e’tibor qaratdi.

Ushbu qonun loyihasi qimmatbaho metallar va toshlar, shuningdek, ulardan tayyorlangan zargarlik buyumlarining noqonuniy aylanmasini kamaytirishga qaratilgani qayd etildi. Muhokamalar davomida deputatlar huquqiy asoslar, ijro mexanizmlari hamda korrupsiyaviy omillarni bartaraf etish masalalari yuzasidan fikr bildirdi.

Ayrim deputatlar qonunchilik hujjatlari o‘rtasidagi xronologik nomutanosiblik va uning tadbirkorlar faoliyatiga ta’siriga ham e’tibor qaratdi. Munozaralar yakunida qonun loyihasi deputatlar tomonidan qo‘llab-quvvatlandi.

Eslatib o‘tamiz, 2025-yil yanvar oyida ham Qonunchilik palatasi majlisida deputatlar Samarqand viloyatining Samarqand shahri, Samarqand va Oqdaryo tumanlari chegaralarini o‘zgartirish to‘g‘risidagi masalani ko‘rib chiqqan. Majlisda qaror loyihasi tegishli mahalla fuqarolar yig‘inlari, xalq deputatlari Samarqand shahar, Samarqand va Oqdaryo tumanlari hamda viloyat Kengashlarida muhokama qilinib, chegaralarning kartografik chizmasi va chegaralar chizig‘ining tasnifi ma’qullangani qayd etilgan.

Shuningdek, qaror loyihasida hududning chegaralarini o‘zgartirish va unda belgilangan vazifalarni tizimli amalga oshirish maqsadida Hukumatga kompleks chora-tadbirlarni amalga oshirish vazifasi yuklatilgan. Hududda 112 km ichki yo‘llar, piyodalar va velosiped yo‘laklari, 6 km yer usti metro yo‘li, 2 ta katta ko‘prik hamda 7,2 km ichki kommunikatsiya uchun tonnel, 180 km irrigatsiya quvuri hamda 14 km kanal va ko‘plab sug‘orish inshootlari qurilishi rejalashtirilgan.

• Oliy Majlis
• Qaror
• Samarqand