Samarqand viloyati Kattaqo‘rg‘on tumanida 20 yoshli yigit bolalikdagi kelishmovchilik sababli do‘stini o‘ldirdi. Bu haqda Oliy sud axborot xizmati xabar berdi.

Xabarga ko‘ra, Kattaqo‘rg‘on tumanida yashovchi B. ismli yigit Rossiyada ishlab kelgandan so‘ng do‘sti Y. ismli yigitdan bolalikdagi ziddiyat tufayli qasd olishga qaror qilgan va uni o‘ldirish rejasini tuzgan.

Ayblanuvchi uyidan yog‘och va oshxona pichog‘ini olib, do‘sti yashaydigan ko‘chaga borgan. U do‘sti mazkur ko‘chadan o‘tayotgan paytda orqadan hujum qilib, unga tashlangan. Pichoq va kaltak zarbalari fuqaro Y.ning o‘limiga sabab bo‘lgan.

Holat yuzasidan jinoyat ishi qo‘zg‘atilib, sudda mazmunan ko‘rib chiqilgan. Sud barcha hujjatlarni ko‘rib chiqib, tomonlarni tingladi. Sudlanuvchiga nisbatan Jinoyat kodeksining 97-moddasi 2-qismi “j” bandi bilan 16 yil ozodlikdan mahrum qilish jazosi tayinlandi.

• O'lim
• Qotillik
• Samarqand