Avval xabar berilganidek, Samarqand viloyati Kengashining navbatdagi sessiyasida viloyat hokimi Erkinjon Turdimov viloyatni ijtimoiy-iqtisodiy rivojlantirish yuzasidan 2021-yilda amalga oshirilgan ishlar yakunlari hamda 2022-yilgi vazifalar toʻgʻrisida xalqqa murojaati boʻlib oʻtdi. Murojaat doirasida viloyat hokimi turizm salohiyati va rivojlantirish istiqbollariga ham toʻxtatildi.

Qayd etilishicha, turizm infratuzilmasini rivojlantirish doirasida kelgusi yilda 212 gektar yer maydonida “Samarqand biznes va turizm markazi” barpo etilmoqda.

Unda, xalqaro kongress markazi, “Abadiy shahar” karvonsaroy majmuasi, 8 ta mehmonxona, dam olish va koʻngilochar obʼyektlar, hunarmandchilik markazi, sunʼiy suv havzalari quriladi. Keltirilishicha, ushbu turizm markazi kelgusi yilda foydalanishga topshiriladi.

Shuningdek, Payariq tumanida 21 gektar maydonda bogʻ va xiyobonlar, 10 ming oʻrinli masjid, 3 ta mehmonxona, 24 ta oilaviy mehmon uylaridan iborat, ziyorat turizmi majmuasi barpo etilmoqda.

Bundan tashqari, Samarqand xalqaro aeroporti ham tubdan qayta qurilmoqda. Kelgusi yilda aeroportga parvozlar soni 7 barobarga oshib, yoʻlovchilar oqimi 220 mingdan 1,5 million nafarga yetkaziladi.

Sayyohlarga sifatli xizmat koʻrsatishni kengaytirish maqsadida, 150 dan ortiq yangi mehmonxona va oilaviy mehmon uylari tashkil etilib, yotoq oʻrinlar soni 17 mingtaga yetkaziladi. Kelgusi yildan boshlab Xalqaro gastronomik festivali oʻtkaziladi.

Shu bilan birga, xalqaro kulinariya va servis maktabi tashkil etilib, oʻqitishga Fransiya, Italiya, Yaponiya, Turkiyadan yetakchi restoratorlar jalb etiladi.

• Samarqand
• hokim
• sessiya