Samarqandda uch nafar farzandini o‘ldirgan otaga nisbatan umrbod ozodlikdan mahrum qilish jazosi tayinlandi. Bu haqda “Yoshlar” telekanalida ma’lum qilindi.

Maʼlum boʻlishicha, joriy yilning 16-iyun kuni soat 19:30 lar atrofida Samarqand shahrida 1986-yilda tug‘ilgan fuqaro A.D. Isroilda ishlayotgan turmush o‘rtog‘i bilan telefon orqali janjallashib qolgan. Erkak kelib chiqqan o‘zaro kelishmovchilik oqibatida turmush o‘rtog‘idan o‘ch olish maqsadida voyaga yetmagan 3 nafar farzandini oshxona pichog‘i bilan tanalarining turli joylariga qasddan urib, o‘ldirgan. Soʻngra, erkak pichoq bilan o‘ziga ham tan jarohati yetkazgan.

Holat yuzasidan fuqaro A.D.ga nisbatan Jinoyat kodeksining 97-moddasi 2-qismi “a”, “v” bandlari bilan jinoyat ishi qo‘zg‘atilgan edi.

Tergov davomida ijtimoiy tarmoqlarda tarqalgan xabarlar, ya’ni erkak o‘sha vaqtda giyohvand modda ta’sirida bo‘lgani haqida taxminlar o‘z tasdig‘ini topmagan.

“Ayolim boshqa sen bilan yashamayman. Mening erim bor, hayotim bor, dedi. Katta qizcham qo‘limda jon berdi. Ko‘rib, qo‘rqib ketdim. Yig‘ladim, dodladim, keyin o‘zimni pichoqladim. Shu bilan hushimdan ketdim. O‘zimga kelsam shifoxonada ekanman”, deydi o‘z farzandlarining qotiliga aylangan ota.

Unga nisbatan Jinoyat kodeksining 97-moddasi 2-qismi “a”, “v”, “j” bandlari bilan umrbod ozodlikdan mahrum qilish jazosi tayinlandi.

• IIB
• Qotillik
• Samarqand