Samarqand tumani Yuqori Turkman mahallasidagi xonadonlardan birida 2 kishining jasadi topildi. Holatni batafsil o‘rganish uchun tuman hokimining qarori qabul qilingan.

Xabarda aytilishicha, joriy yilning 11-dekabr kuni Samarqand tumani “Yuqori Turkman” MFY Yangihayot ko‘chasi 1-uyda yashovchi fuqaro A.U. xonadonida tabiiy gazdan ehtiyotsizlik bilan foydalanish oqibatida 2 nafar fuqarolarning jasadi topilgan.

Sud tibbiy ekspertizaning dastlabki ma’lumotiga ko‘ra, ushbu 2 nafar fuqaro noma’lum etiologik moddadan zaharlangan deb gumon qilinmoqda.

Mazkur holatni o‘rganish uchun tuman komissiyasi tuzilgan. Komissiya tomonidan baxtsiz hodisa sodir bo‘lgan joyning holati bo‘yicha o‘zgarishlarni qayd etish, tabiiy gazdan foydalanish uskuna va jihozlarning turi, rusumi, markasi, ularning joylashuv o‘rni va texnik holatini aniqlash, dudbo‘ron va shamollatish kanallarining loyiha hujjatlariga, belgilangan norma va qoidalarga muvofiqligini aniqlash, baxtsiz hodisa guvohlari bilan suhbat olib borish kabilar ko‘zda tutilgan.  

• Is gazi
• Samarqand