Samarqand viloyati Pastdarg‘om tumanida yashovchi bir oilaning to‘rt nafar a’zosi botulizmdan zaharlangan. Ta’kidlanishicha, ushbu hodisa 2024-yil 1-noyabrda sodir bo‘lgan.

Mang‘itobod mahallasida yashovchi oilaning to‘rt nafar a’zosi – er-xotin va ikki bola uy sharoitida tayyorlangan konserva mahsulotlarini iste’mol qilgan. Shundan so‘ng, ularning sog‘ligi yomonlashgan.

Zudlik bilan ular shifoxonaga yotqizilgan va tekshiruvlarda botulizmdan zaharlanishgani aniqlangan. Achinarlisi, shifoxonada oilaning kenja farzandi vafot etgan.

Pastdarg‘om tumani tibbiyot birlashmasiga qarashli yuqumli kasalliklar shifoxonasi shifokori esa bola boshqa kasallikdan vafot etganini aytgan.

Shuningdek, bolaning onasi ham u o‘sha kuni konserva mahsuloti yemaganini, unda sudurgi kasalligi bo‘lganini ma’lum qilgan.

Tuman SES xodimi esa bola ham zaharlanishdan vafot etgani va yuqumli kasalliklar shifoxonasi shifokorlari unga tashxis qo‘yishda adashganini ta’kidlamoqda.

• Samarqand
• Zaharlanish