Samarqandda qalbaki valyuta qimmatliklarini muomalaga kiritgan shaxs aniqlandi. Bu Bosh prokuratura huzuridagi Iqtisodiy jinoyatlarga qarshi kurashish Departamentning matbuot xizmati xabar berdi.

Qayd etilishicha, Bosh prokuratura huzuridagi Departamentning Samarqand shahar bo‘limi tomonidan tergovga qadar tekshiruv o‘tkazilgan. Ushbu jarayon davomida, fuqaro M.D. (muqaddam sudlangan) “Xo‘jasoat” MFY hududida 2 bosh qo‘y xaridi uchun fuqaro A.X.ga 4 dona 100 AQSh dollarlik qalbaki kupyuralarni berib ketganligi aniqlangan.

“Hurmatli fuqarolar, qalbakiligini bilmagani holda qalbaki valyuta qimmatliklarini olib, uni keyinchalik o‘tkazgan shaxsning qilmishi ham jinoiy javobgarlikni keltirib chiqaradi. Shu bois, o‘zaro hisob-kitoblarni O‘zbekiston Respublikasi hududida qonuniy to‘lov vositasi hisoblangan milliy valyutada amalga oshirish orqali o‘zingizni noqonuniy harakatlardan asragan bo‘lasiz”– deyiladi department xabarida.

Mazkur holat yuzasidan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) bilan jinoyat ishi qo‘zg‘atilib, tergov harakatlari o‘tkazilmoqda.

• Kupyura
• Samarqand
• qalbaki