Kecha, 25-may kuni taxminan soat 14:00 larda Samarqand viloyatining Paxtachi tumanida 3 nafar voyaga yetmagan bola “Zarafshon” daryosiga cho‘milish maqsadida borib, ehtiyotsizlik oqibatida cho‘kib ketishgan. Bu haqda Bosh prokuratura matbuot xizmati rahbari Hayot Shamsutdinov ma'lum qildi.

FVB hamda IIB xodimlari tomonidan olib borilgan qidiruv ishlari natijasida 1 nafar bolaning murdasi topilgan.

Qolgan 2 nafar bolani qidirib topish ishlari olib borilmoqda. Hozirda marhumning o‘limi bo‘yicha sud-tibbiyot ekspertizasi tayinlangan.

Hozirda tergovga qadar tekshiruv harakatlari davom etmoqda.

“Bunday ko‘ngilsiz hodisalarni oldini olish maqsadida cho‘milish ruxsat etilmagan, taqiqlangan, oqim tezligi yuqori bo‘lgan, chuqur, o‘ziga notanish bo‘lgan suv havzalarida cho‘milmaslik qoidalariga qat’iy rioya qilishingizni so‘rab qolamiz”, – deyiladi xabarda.

• Bosh prokuratura
• O'lim
• Samarqand