Joriy yil 8-may kuni tungi soat 02:40 larda Samarqand viloyati Toyloq tumanida joylashgan Badal qishlog‘ida odam o‘limi bilan bog‘liq yo‘l-transport hodisasi sodir bo‘ldi.

Viloyat IIB YHXB bergan maʼlumotga ko‘ra, Samarqand tumanida yashovchi haydovchi Nexia bilan ketayotib boshqaruvni yo‘qotgan va mashina salonidagi 5 nafar kishi bilan birga kanalga tushib ketgan. Oqibatda uning salonida bo‘lgan Samarqand tumani Puli Mug‘ob mahallasida yashovchi 15 va 16 yoshli ikki nafar voyaga yetmagan (Samarqand tumani 24-maktabning 7 va 8-sinflari o‘quvchilari bo‘lgan) o‘smirlar hamda 29 yoshli yigit vafot etgan.

– Men zo‘rg‘a suv yutib chiqib oldim. Jonholatda qayta suvga kirib, qo‘limga ilingan biri kishini tortdim, haydovchi ekan. U suvdan chiqishi bilan orqasiga qaramay qochib ketdi. Men uning orqasidan qolganlarga ham yordam berishini so‘rab baqirgancha qolaverdim, – deydi vafot etgan ikki nafar bolaning otasi.

Dastlabki surishtiruvda ham haydovchining mashinani boshqara olmay kanalga tushirib yuborgani va YTHdan so‘ng mashinadan chiqib qochib ketgani aniqlangan.

Qayd etilishicha, hodisa yuzasidan Toyloq tumani IIB tomonidan Jinoyat kodeksining 266-moddasi 3-qismi bilan jinoyat ishi qo‘zg‘atilgan.

Hozirda dastlabki tergov harakatlari olib borilmoqda.

• Haydovchi
• Samarqand
• YTH