Keksalar va nogironligi bo‘lgan shaxslarga sanatoriylarda davolanish uchun yo‘llanmalar berishda elektron navbat joriy etildi.

Ma’lumki, O‘zbekiston Respublikasi Tibbiy-ijtimoiy xizmatlarni rivojlantirish agentligi tizimidagi keksalar, nogironligi bo‘lgan shaxslar, urush va mehnat faxriylari, urush nogironlari va qatnashchilariga tenglashtirilgan shaxslar, halok bo‘lgan harbiy xizmatchilarning yangi nikohdan o‘tmagan beva xotinlari (beva erlari) uchun sanatoriylarga yo‘llanma beriladi.

Shuningdek, respublika ahamiyatiga molik shaxsiy pensiya oluvchi shaxslar, Chernobil AES halokati oqibatida nurlanish kasalligiga chalingan va uni boshidan kechirgan shaxslar, shuningdek, Chernobil halokati sababli nogiron bo‘lib qolgan shaxslar, Yadro poligonlari va boshqa radiasiya-yadro ob’yektlarida harbiy xizmatni o‘tagan pensiya yoshidagilar ham mazkur imkoniyatdan foydalanishlari mumkin.

1 va 2-guruh nogironligi bo‘lgan shaxslar, ko‘zi ojiz 1-guruh nogironini kuzatib boruvchi shaxslarga, o‘zgalar parvarishiga muhtoj bo‘lgan yolg‘iz keksalarga va yoshga doir pensiya oluvchilarga ham sanatoriylarda davolanish uchun yo‘llanmalar beriladi.

Yo‘llanmalarni berish davriyligi (birlamchi murojaat etganlar bundan mustasno) har yili – navbat asosida iborat bo‘ladi.

Shuningdek, foydalanuvchilar Davlat xizmatlari markazlari yoki Yagona interaktiv davlat xizmatlari portali orqali (YAIDXP) bu imkoniyatdan foydalanish mumkin. Elektron tizim orqali yo‘llanmalar rasmiylashtirilgandan keyin Davlat xizmatlari markazlariga keksalar va nogironligi bo‘lgan shaxslarning o‘zlari yoki vakillari kelib, yo‘llanmalarning elektron yoki qog‘oz shaklidagi nusxalarini olishi ham mumkin.

Ma’lumot o‘rnida ta’kidlash lozimki, bugungi kunda Tibbiy-ijtimoiy xizmatlarni rivojlantirish agentligi tizimida 11 ta sanatoriy mavjud bo‘lib, ularning bir yillik sog‘lomlashtirish quvvati 45 ming nafar fuqaroni tashkil qiladi. 2024-yilga qadar esa har biri 100 o‘ringa mo‘ljallangan yana 4 ta sanatoriy qurish ko‘zda tutilgan.

• Keksalar
• O‘zbekiston
• Sanatoriy