Saudiya Arabistoni tashrif buyuruvchilar va aholini 2024-yilgi haj mavsumida zarur ruxsatnomalarsiz qatnashishdan ogohlantirdi. Bu haqda Haj va umra vazirligi bergan ma’lumotga tayanib, “Gulf News” xabar berdi.

Xabarga ko‘ra, ushbu tizimning uzluksiz ishlashini ta’minlash va yuzaga kelishi mumkin bo‘lgan huquqbuzarliklarni kamaytirish maqsadida qattiq jazo choralari joriy etilgan. Saudiya Arabistoni rasmiylari Pasportlar Bosh boshqarmasi bilan hamkorlikda haj qoidalarini buzgan shaxslarga nisbatan og‘ir jazolar belgilagan. Haj va umra vazirligi zarur ruxsatnomalarsiz haj qilish noqonuniy ekanini va 50,000 Saudiya riali (taxminan 13,332 AQSh dollari) miqdorida jarimaga tortilishini ta’kidlagan.

Bundan tashqari, tegishli ruxsatnomasiz ziyoratchilarni olib kelayotgan shaxslar ham xuddi shu miqdorgacha jarimaga tortiladi. Bunday qonunbuzarliklarda aybdor deb topilgan chet ellik fuqarolar olti oyga hibsga olinadi, keyin Saudiya Arabistonidan deportatsiya qilinadi. Ularga 10 yil davomida mamlakatga qayta kirish taqiqlanadi.

• Haj
• Ogohlantirish
• Umra
• ziyoratgoh