Oltin narxi yangi yuqori darajaga ko‘tarildi, chunki investorlar AQSh va Xitoy o‘rtasidagi savdo urushi oqibatlaridan xavotirga tushmoqda. Bu haqda BBC xabar berdi.

16-aprel kuni jonli bozorda oltin har bir unsiya uchun 3,357.40 AQSh dollariga yetdi, so‘ngra biroz pasaydi. Bu yil boshidan beri narx taxminan uchdan bir qismga oshgan.

Bu o‘sish AQSh Markaziy banki rahbari Jerom Pauellning izohlaridan so‘ng kuzatildi. Uning aytishicha, Donald Trampning tarif siyosati sekinroq iqtisodiy o‘sish, narxlarning oshishi va ishsizlik xavfini keltirib chiqarishi mumkin.

Qimmatbaho metall iqtisodiy beqarorlik paytida investorlar uchun xavfsiz aktiv sifatida qaraladi. 16-aprel kuni Chikagodagi Iqtisodiy klubda Jerom Pauell shunday dedi: 

“So‘nggi haftalarda e’lon qilingan kutilmagan yuqori tariflar AQSh iqtisodiy o‘sishini sekinlashtirishi va iste’molchilar uchun narxlarni oshirishi mumkin”.

Uning nutqi xalqaro moliya bozorlaridagi beqarorlik davridan keyin yangradi — investorlar yangi import bojlari va AQSh-Xitoy o‘rtasidagi kuchayib borayotgan savdo urushlariga javob qaytarmoqda.

SPI Asset Management kompaniyasining savdo va bozor strategiyasi bo‘yicha rahbari Stiven Innesning aytishicha, oltin to‘liq “qutqaruv qayig‘i” holatida, u dunyodagi eng ommaviy savdo aktiviga aylangan. 

“Dollar savdo siyosatining keskin o‘zgarishlari ostida larzaga kelmoqda va portfel boshqaruvchilari siyosiy yechimlarga ishonchni yo‘qotishdi”, – deya qo‘shimcha qilgan Innes.

Analitiklar bu yilgi oltin narxidagi o‘sishni 40 yildan ortiq avvalgi Eron inqilobi bilan solishtirishmoqda. O‘shanda, 1979-yil noyabrdan 1980-yil yanvargacha oltin narxi deyarli 120 foizga oshgan edi.

Oltin ilk bor o‘tgan oyda har unsiya uchun 3,000 AQSh dollaridan oshib o‘tdi, chunki global savdo urushi ta’siri haqidagi noaniqlik ortgan edi.

• AQSh
• Davlat boji
• Oltin
• Xitoy
• savdo