Joriy yilning 2-noyabr kuni Oliy Majlis Senatining rasmiy veb-sayti buzib kirilgani haqida xabar berilgandi. Keyinchalik Marsh Golden guruhi bu ish uchun javobgarlikni o‘z bo‘yniga olgani, uning asoschisi esa 14 yoshli bola ekani aniqlangandi. Ichki ishlar vazirligi Kiberxavfsizlik markazining ma’lum qilishicha, aybini tan olib televideniyaga intervyu bergan, o‘zini guruh yetakchisi deb tanishtirgan bola aslida u bo‘lmagan.

Ma’lum qilinishicha, bu ishni amalga oshirgan fuqaro Namangan viloyati Norin tumanida 3-noyabr kuni huquqni muxofaza qilish organlari tomonidan qo‘lga olingan.

“Saytning zaifliklari borligi unga yaqinda xujum uyushtirilishi haqida 28-oktyabr kuni ogohlantirish yuborganman. Lekin kamchiliklar bartaraf etilmagan va menga javob qaytarishmagan. Shu sababdan men bu ishni amalga oshirishga qaror qildim. Bu ishim aslida jinoyat ekanligini bilmagandim”, — degan u.

Shuningdek, u televideniye orqali o‘zini Marsh Golden guruhining yetakchisi deb tanishtirgan bolaning aslida bu ishga umuman aloqasi yo‘qligini, bu guruhning boshlig‘i ham, asoschisi ham o‘zi ekanini ta’kidlagan.

“2022-yilda o‘g‘limning dasturlarga qiziqishi borligi uchun unga kompyuter olib bergandim. Keyin 3-noyabr kuni uyimizga soha xodimlari kelib, Senatning saytiga o‘g‘lim xujum qilganini, uning kompyuterini ko‘rib, buni tasdiqlashlarini aytishdi. Aniqlanishicha, haqiqatdan ham saytni u buzgan ekan. Men hammadan uzr so‘rayman, qolgan ota-onalardan ham farzandlari tarbiyasiga, ular qanday ishlar bilan shug‘illanayotganiga e’tiborli bo‘lishlarini so‘rayman”, — degan uning otasi.

Hozirda yig‘ilgan daliliy ashyolar yuzasidan huquqiy baho berish maqsadida ekspertiza guruhi tayinlangan. Holat yuzasidan surishtiruv tergov harakatlari olib borilmoqda.

• Senat
• xaker