AQSh prezidenti Donald Tramp Amerika harbiy-havo kuchlari Erondagi uchta eng yirik yadroviy obyektni bombardimon qilganidan keyin xalqqa murojaat qildi.

Uning so‘zlariga ko‘ra, Fordo, Natanz va Isfahon yadroviy obyektlari “to‘liq” yo‘q qilingan va bu “mislsiz harbiy muvaffaqiyat” natijasi bo‘lgan.

“Eron endi tinchlikni tanlashi kerak. Aks holda, keyingi hujumlar bundan ham kattaroq va ancha vayronkor. Yana ko‘plab nishonlar bor. Agar tinchlikka tez orada erishilmasa, biz ularni aniqlik, tezlik va mahorat bilan yo‘q qilamiz”, — deya ogohlantirgan Tramp.

AQSh prezidenti, shuningdek, bu holat davom etmasligini aytgan. “Yoki tinchlik bo‘ladi, yoki Eron uchun, so‘nggi sakkiz kun ichida ko‘rganimizdan ancha dahshatli fojia yuz beradi”, — deya ta’kidlagan u.

Qo‘shma Shtatlar prezidenti o‘z murojaatida Isroil bosh vaziri Binyamin Netanyaxuga minnatdorchilik bildirib, AQSh va Isroil “bir jamoa sifatida ishlaganini” aytgan.

“Men bosh vazir Binyamin Netanyaxuga minnatdorchilik bildirmoqchiman. Biz bir jamoa sifatida, hamkorlikda ishladik. Bu Isroil uchun xavfni yo‘q qilish yo‘lida katta qadam bo‘ldi. Isroil armiyasiga qilgan ajoyib ishi uchun minnatdorchilik bildiraman”, — degan Tramp.

Prezidentga ko‘ra, bu hujumlarning asosiy maqsadi Eronning yadro boyitish imkoniyatini tugatish va “terrorizmning dunyodagi eng yirik homiysi” tomonidan kelayotgan yadro tahdidini to‘xtatish bo‘lgan.

• AQSh
• Eron
• Havo hujumi
• Murojaat
• Tramp
• Yadroviy qurol