“Mutlaqo ajoyib natija. Bu Ukraina tomonidan mustaqil tarzda amalga oshirilgan harakat. Buni rejalashtirish boshlanganidan samarali amalga oshirilishigacha bir yil, olti oy va to‘qqiz kun o‘tdi. “O‘rgimchak to‘ri” operatsiyasini tayyorlagan odamlarimizni Rossiya hududidan o‘z vaqtida olib chiqib ketdik.

Ushbu muvaffaqiyati uchun Ukraina Xavfsizlik xizmati (SBU) rahbari Vasiliy Malyuk va boshqalarga minnatdorchilik bildirdim. Xavfsizlik xizmatiga jamoatchilikka operatsiya tafsilotlari va natijalari haqida, ochiqlanishi mumkin bo‘lgan ma’lumotlarni yetkazishni topshirdim. Albatta, hozircha hammasini aytib bera olmaymiz, ammo Ukrainaning bu harakatlari tarix darsliklariga kiritiladi. Ukraina o‘zini adolatli ravishda himoya qilmoqda va biz urushni yakunlash zarurligini Rossiyaga his qildirish uchun barcha choralarni ko‘ryapmiz”, — deya ma’lum qildi Zelenskiy o‘z murojaatida.

U, shuningdek, Rossiyadagi bombardimonchi samolyotlarga hujum bo‘yicha “O‘rgimchak to‘ri” operatsiyasini tayyorlash markazi aynan Rossiyada joylashganini ta’kidlagan.

“Bizning operatsiyamiz shtabi Rossiya hududida, ularning viloyatlaridan biridagi Rossiya Federal xavfsizlik xizmati (FSB) boshqarmasi yonida joylashgan edi”, — deya aniqlik kiritgan prezident.

Zelenskiy, shuningdek, operatsiya davomida jami 117 dron ishlatilganini, ular operatorlar tomonidan masofadan turib boshqarilganini ma’lum qilgan. Uning so‘zlariga ko‘ra, Rossiya 40 dan ortiq strategik aviatsiya qurilmasini yo‘qotgan.

• Rossiya
• Ukraina
• Urush
• Zelenskiy