3-mart kuni Senatda xalqaro munosabatlar, tashqi iqtisodiy aloqalar, xorijiy investitsiyalar va turizm masalalari qo‘mitasi raisining o‘rinbosari Odiljon Mamatkarimovning Misr Arab Respublikasining O‘zbekiston Respublikasidagi Favqulodda va Muxtor elchisi Tamir Fathi Abdussalom Hammad bilan uchrashuvi bo‘lib o‘tdi.

Uchrashuvda ikki mamlakat parlamentlari o‘rtasidagi munosabatlar, jumladan, joriy yilning 5-9-aprel kunlari Toshkentda bo‘lib o‘tadigan parlamentlararo ittifoqning 150-yubiley Assambleyasida Misr parlament delegatsiyasining ishtiroki yuzasidan fikr almashildi.

Elchiga bunday nufuzli tadbir O‘zbekistonda tarixda birinchi marta o‘tkazilayotgani va unda parlamentlararo ittifoqqa a’zo 190 ga yaqin davlatlardan 2 mingga yaqin parlament a’zolari ishtirok etishi haqida xabar berildi.

T. Hammadning ta’kidlashicha, ushbu tadbirda ishtirok etish uchun Misr Arab Respublikasi parlamenti raisi boshchiligidagi delegatsiyaning 14 a’zosi O‘zbekistonga tashrif buyuradi.

Shu munosabat bilan parlamentlararo ittifoq Assambleyasi bilan bog‘liq tashkiliy masalalar yuzasidan fikr almashildi.

• Elchi
• Misr
• Senat