Nodirbek Baxtiyorovich Sayfullayev O‘zbekiston Respublikasi Prezidenti Administratsiyasi madaniyat va san’atni rivojlantirish shoʻbasi mudiri lavozimiga tayinlandi.

Nodirbek Sayfullayev 1975-yil Toshkent shahrida tug‘ilgan. 1996-yil Toshkent davlat Madaniyat institutini, 2005-yilda O‘zbekiston Respublikasi Prezidenti huzuridagi Davlat boshqaruvi akademiyasini tamomlagan, san’atshunoslik fanlari nomzodi. Nodirbek Sayfullayev O‘zbekiston Respublikasi Oliy Majlisi Senatining a’zosi Baxtiyor Sayfullayevning o‘g‘li hisoblanadi.

Mehnat faoliyati davomida “O‘zbekteatr” birlashmasi boshqarma boshlig‘i o‘rinbosari, bosh direktori o‘rinbosari vazifalarida ishlagan. Shuningdek, o‘rindoshlik asosida O‘zbekiston davlat san’at institutining San’atshunoslik kafedrasida pedagoglik faoliyatini olib borgan.

2014-yil martdan O‘zbekiston Respublikasi Vazirlar Mahkamasida bosh mutaxassis, 2016-yil oktyabrdan Madaniyat va san’at masalalari shoʻba mudiri lavozimlarida ishlagan.

Ta’kidlash joizki, Nodirbek Sayfullayev shu kunga qadar Kamoliddin Behzod nomidagi Milliy rassomlik va dizayn instituti rektori lavozimida faoliyat yuritib kelayotgan edi.

Eslatib o‘tamiz, avvalroq Kamoliddin Behzod nomidagi Milliy rassomlik va dizayn instituti rektori lavozimiga Abbosjon Mirzorahimov tayinlangani haqida xabar berilgan edi.

• O‘zbekiston
• rektor